Թուրքիան ընդունել է լիբիացի ապստամբներին ղեկավար մարմինը` Անցումային ազգային խորհուրդը, որպես Լիբիայի ժողովրդի օրինական ներկայացուցիչ: Ինչպես հայտնել է Բենգազիում այցով գտնվող Թուրքիայի ԱԳՆ ղեկավար Ահմեդ Դավութօղլուն, «բարեփոխումների պահանջը, որով հանդես է գալիս ժողովուրդը, պետք է բավարարվի, Մուամար Քադաֆին պետք է հեռանա, և Լիբիան չպետք է բաժանվի նրա կողմնակիցների և հակառակորդների միջև»:
Թուրքիան նաև խոստացել է լիբիացի ապստամբներին հատկացնել 200 մլն դոլար օգնություն հունիսին խոստացված 100 մլն դոլարի հետ միասին: Անցումային ազգային խորհուրդն արդեն ճանաչել են տասնյակ երկրներ, այդ թվում` Գերմանիան, Իտալիան և Ֆրանսիան:
Դավութօղլուի այցը Բենգազի վկայում է այն մասին, որ Թուրքիան, որը սկզբից դեմ էր Քադաֆիի դեմ ռազմական գործողություններին, որոշել է աջակցել լիբիացի ապստամբներին, հաղորդում է BBC-ն:
