Ադրբեջանցիների Ղարաբաղ և հայերի Բաքու վերադառնալու հարցը նախնական աշխատանք է պահանջում երկու ժողովրդների հաշտեցման ուղղությամբ, ինչով ԵԱՀԿ ՄԽ համանախագահները ամենևին չեն զբաղվում: Այդ մասին հայտարարել է իսրայելցի քաղաքագետ, հրապարակախոս, հասարակական գործիչ Ավիգդոր Էսկինը:
«Կարելի է Բաքու հրավիրել այնպիսի հեղինակավոր հայերի, ինչպիսիք են Արմեն Ջիգարխանյանը, Ալեքսանդր Միրզոյանը և Միշել Լեգրանը, ադրբեջանցի մտավորականների հետ ժողովրդական դիվանագիտության պլանը մշակելու համար»,-ասել է իսրայելցի փորձագետը՝ հավելելով, որ Ադրբեջանը միայն կշահի նման քայլերից», հայտնում է Vesti.az:
Նման փորձեր ձեռնարկվել են 2007 և 2009թթ., երբ ՌԴ-ում Հայաստանի և Ադրբեջանի դեսպաններ Արմեն Սմբատյանի ու Փոլադ Բյուլ Բյուլ օղլուի և ՌԴ նախագահի միջազգային մշակութային համագործակցության գծով ներկայացուցիչ Միխայիլ Շվիդկոյի նախաձեռնությամբ, հայ և ադրբեջանցի մտավորականներն այցելեցին Երևան, Բաքու և նույնիսկ Ստեփանակերտ:
ՌԴ-ում Հայաստանի ու Ադրբեջանի դեսպաններ Արմեն Սմբատյանի ու Փոլադ Բյուլ-Բյուլ օղլուի, ինչպես նաեւ երկու երկրների մտավորականների այցը Ստեփանակերտ ուղղակի վիրավորական էր ԼՂՀ Պաշտպանության բանակի ու ժողովրդի համար: Այդ մասին հայտարարեց ԼՂՀ ԱԺ պաշտպանության, ներքին գործերի ու անվտանգության մշտական հանձնաժողովի նախագահ Ժաննա Գալստյանը: «Եթե նրանք մեկ անգամ եւս գան, ապա ձեռնունայն կվերադառնան»,-ասել է Գալստյանը:
