Արտահերթ ընտրությունների անցկացման անհրաժեշտության հիմնավորման խնդրում բազմաթիվ փաստարկների շարքում առկա է մեկը, որը մոռացության է մատնված։ Այդ մասին, ելույթ ունենալով օգոստոսի 2-ի հանրահավաքում, հայտնել է ՀԱԿ-ի առաջնորդ, Հայաստանի առաջին նախագահ Լևոն Տեր-Պետրոսյանը: «Հանրության մոտ կարծիք է ձևավորվել, թե իբր 2008թ. նախագահական ընտրությունների արդյունքները և Սերժ Սարգսյանի լեգիտիմությունը չեն ճանաչել միայն Հայ ազգային կոնգրեսի կողմնակիցները։ Այնինչ հայտնի է, որ սկզբնապես այդ ընտրությունները կեղծված են համարել նաև Դաշնակցություն և «Օրինաց երկիր» կուսակցությունների թեկնածուները»,- հայտնել է Տեր-Պետրոսյանը` ավելացնելով, որ դա արձանագրված է, մասնավորապես, միջազգային դիտորդական առաքելությունների զեկույցներում։
ՀՀ առաջին նախագահի խոսքով, այն, որ այդ կուսակցությունները հետագայում գործարք կնքելով Սերժ Սարգսյանի հետ, ընդգրկվեցին կոալիցիոն կառավարության կազմում, ոչնչով չի փոխում նրանց նախնական գնահատականը, որովհետև դա արդեն «պատմական փաստ է, իսկ պատմական փաստերը փոփոխության ենթակա չեն»:
