Իտալական Slow Food հիմնադրամի շրջանակներում կազմակերպված Terra Madre ծրագրի շուրջ 80 մասնակիցներին այսօր Հայաստանի պետական ագրարային համալսարանում հանձնվեցին մասնակցության վկայականներ:

«Terra Madre-ն շրջում է աշխարհով մեկ, միավորում է մարդկանց, գնահատում է սնունդն ու գյուղատնտեսական արտադրանքը` որպես մշակութային ժառանգություն: Այս և նման այլ միջոցառումներն ընդգծում են գյուղատնտեսության նշանակությունը բոլորիս համար»,- ասաց Իտալիայի դեսպան Բրունո Սկապինին` հավելելով, որ գյուղատնտեսությունը Հայաստանն ու Իտալիան կապող օղակներից մեկն է:

Slow Food հիմնադրամը ստեղծվել է 25 տարի առաջ Իտալիայում ի հակակշիռ Fast Food-ի և տարածվել աշխարհով մեկ: Այն քարոզում է առողջ սնունդ և ազգային ուտեստների պահպանում:

Ագրարային համալսարանի ռեկտոր Արշալույս Թարվերդյանի խոսքով` այս միջոցառումը կնպաստի համալսարանում սնունդին առնչվող տասը մասնագիտությունների կատարելագործմանը և ստացված գիտելիքները կներառվեն ուսումնական ծրագրերում:

«Terra Madre-ն Slow Food հիմնադրամի նախագծերից մեկն է, որի նպատակն է խրախուսել կենսաբազմազանության, ավանդական ուտեստների պահպանումը և զարգացումը, ինչպես նաև` էկոտուրիզմը»,- ասաց Հայաստանում Slow Food հիմնադրամի ներկայացուցիչ Ռուսլան Թորոսյանը: Նա նշեց, որ հայկական երկու սննդատեսակ` այծի կաթից պատրաստվող մոթալ պանիրն ու շալախ ծիրանը ընդգրկվել են «Համի տապան» ցանկում, որտեղ ներառված են արդեն իսկ ոչնչացված կամ ոչնչացման եզրին գտնվող կերակուրներն ամբողջ աշխարհից:

«Հայկական մոթալ պանիրը, ֆրանսիական ռոկֆորի ու իտալական պարմեզանի հետ միասին, Իտալիայում անցկացովղ Terra Madre մեծ հավաքի ժամանակ ստացել է բարձրակարգ պանրի կոչում»,- մանրամասնեց կազմակերպիչներից Տաթևիկ Թորոսյանը: Նա հավելեց, որ դրանից հետո փորձ է արվել սկսել տվյալ պանրի արտահանում, սակայն արտահանման համար Հայաստանում առկա ոչ բարենպաստ պայմանները թույլ չեն տալիս իրականացնել նախագիծը:

«Հարկերն այնքան բարձր են, որ եթե արտահանենք, ստիպված կլինենք ինքնարժեքից 3 անգամ թանկ վաճառել»,- ասաց Տաթևիկ Թորոսյանը:

Slow Food-ի մեկ այլ նախագծի`«Մարկո Պոլոյի» շրջանակներում փորձ է արվում բացահայտել, թե որքանով է մարդու բնակավայրն ու գենետիկան ազդում նրա համային ու հոտային ընկալումների վրա:Այդ նպատակով մասնագետներն անցնելու են Մետաքսի ճանապարհով և գենետիկ թեստերով բացահայտելու են կապը: Նման թեստեր իտալացի մասնագետներն անցկացրել են նաև Հայաստանի տարբեր մարզերում:

Այսօր տեղի ունեցած միջոցառման ընթացքում մասնակիցներն ու հյուրերը հնարավորություն ունեցան համտեսելու վերոնշյալ մոթալ պանիրը, որը մատուցվում է կճուճներով, ինչպես նաև հայկական տնական գաթա և այլ քաղցրավենիքներ