Facebook սոցիալական ցանցում սկսել է տարածվել նոր տրոյան վիրուս՝ Win32/Delf.QCZ։ Այս մասին հայտնում են ESET հակավիրուսային ընկերության ծրագրավորողները, գրում է Lenta.ru-ն։

Վիրուսը տարածվում է չաթի միջոցով և հիմնականում ռուս, բելառուս և ուկրաինացի օգտագործողների շրջանում։

Երբ օգտագործողները ստանում են չաթ-հաղորդագրություններ, որոնք պարունակում են դեպի ինչ-որ կայք տանող լինքեր, այդտեղից էլ կարող է գալ վիրուսը։ Այս տրոյան վիրուսը հաքերային հարձակում է կատարում օգտագործողի Facebook էջի վրա՝ գողանալով օգտագործողի անունը և ծածկագիրը, ինչպես նաև վիրուսը կարող է տրամադրել և տարածել օգտագործողի անձնական տեղեկությունները այլոց։ Բացի դրանից Win32/Delf.QCZ-ը արգելափակում է հակավիրուսային ծրագրի գործողությունները։

2011-ի հուլիսի վերջին հայտնի էր դարձել Facebook-ում տարածված մեկ այլ վիրուսի՝ Trojan.FakeAV.LVT-ի մասին, որը ջնջում էր համակարգիչներից հակավիրուսային ծրագրերը և փոխարինում դրանք նմանատիպ ծրագրերի իմիտացիայով։ Այս վիրուսը նույնպես տարածվում էր Facebook չաթով՝ որը պարունակում էր տեսանյութի լինք։ Վերջինս դիտելու համար օգտագործողից խնդրվում էր ներբեռնել Flash Player ծրագրի նոր տարբերակը։