Սեպտեմբերի 2-5-ը Շուշիում կկայանա տեղեկատվական տեխնոլոգիաների երիտասարդական չկոնֆերանս «ԲարՔեմփ Արցախ-2011»-ը։ Չկոնֆերանս, քանի որ միջոցառումն անցնում է ոչ ֆորմալ մթնոլորտում, ինչը ապահովում է բաց քննարկումներ և մտքերի ազատ փոխանակում։ Այս մասին PanARMENIAN.Net-ի թղթակցին տեղեկացրեց «Արցախի կրթական հիմնադրամ»-ի տնօրեն Վլադիմիր Գրիգորյանը։

«ԲարՔեմփ Արցախ-2011»-ը նվիրված կլինի Արցախի անկախության 20-ամյակին։ Վլադիմիր Գրիգորյանի խոսքով, սեպտեմբերի 2-ին մասնակիցները ներկա կլինեն Արցախի անկախության 20-ամյակին նվիրված համերգին և պարային երեկույթին։

Իսկ սեպտեմբերի 3-ին կկայանա «ԲարՔեմփ Արցախ-2011»-ի պաշտոնական բացումը։

Ըստ Վլադիմիր Գրիգորյանի, այս տարի չկոնֆերանսը կկարողանա ապահովել 60 մասնակցի սնունդով և կացարանով՝ բացի ճանապարհածախսից։

«Մենք ակնկալում ենք 40 մասնակից Արցախից և մի շարք մասնակիցներ Հայաստանից և արտերկրից։ Ակնկալում ենք, նաև որ մասնակիցների մեծամասնությունը շնորհանդեսներ կունենա»,- նշեց Վլադիմիր Գրիգորյանը։

Կոնֆերանսի ընթացքում մասնակիցները կշրջեն Շուշիում, կայցելեն Դադիվանք։ Վլադիմիր Գրիգորյանի խոսքով, «ԲարՔեմփ Արցախ-2011»-ի հիմնական նպատակը հենց Արցախի PR-ն է և ինտերնետում Արցախի մասին ճշգրիտ տեղեկությունների տարածումը։

Գրանցումը կանցկացվի օգոստոսի 13-ից 27-ը։ Բոլոր ցանկացողները կարող են գրանցվել artsakhtoday.com կայքում։

Կազմակերպիչն է «Արցախի կրթական հիմնադրամ»-ը, աջակիցը՝ Արցախի մշակույթի և երիտասարդության հարցերով նախարարությունը։ «ԲարՔեմփ Արցախ-2011»-ը ինտերնետով կապահովի «Արմինկո» ընկերությունը։

Հայաստանում չկոնֆերանսն առաջին անգամ անցկացվել է 2009թ-ին, որին հաջորդել են «ԲարՔեմփ Երևան» 2010 և 2011-ը։ Իսկ Արցախում առաջին անգամ այն կայացել է անցյալ տարի։

BarCamp-ը միջոցառումներ կազմակերպելու նոր ձևաչափ է, որն առաջին անգամ կիրառվել է 2005թ-ին ԱՄՆ-ում՝ Silicon Valley-ում, և հետո ստացել լայն տարածում ողջ աշխարհում։ BarCamp են անվանում տեղեկատվական տեխնոլոգիաների, Ինտերնետի և նոր մեդիաների թեմաներով չկոնֆերանսները։