Երևանի ավագանու անդամ, ճարտարապետ Լևոն Իգիթյանը այսօր լրագրողների հետ հանդիպմանը կրպակների ապամոնտաժումից բողոքող քաղաքացիներին ու պատգամաորներին խորհուրդ տվեց ոչ թե ակցիաներ ու ցույցեր անել, այլ առաջարկություններով դիմել քաղաքապետարան:
«Քաղաքապետարանում նիստի ժամանակ Ազգային ժողովի մի քանի անդամներ բազմություն էին բերել, իրենք էլ եկել նստել էին բորդյուրներին: Ցույց էին տալիս, թե մարդկանց շահերն են պաշտպանում: Ազգային ժողովի այն անդամներն են, որ եթե էս վիճակը չլիներ, ես նրանց գոյությունը չէի էլ նկատելու»,- ասաց բանախոսը:
Լևոն Իգիթյանը տարակուսանք հայտնեց, թե այդքան ժողովրդի շահերի մասին մտածելով, ինչու նույն այդ պատգամավորները քաղաքապետի հետ հանդիպմանը հանդես չեն եկել առաջարկություններով. «Գային ասեին` պարոն քաղաքապետ ես մի առաջարկ ունեմ, լավ բան եք մտածել, առաջարկում եմ՝ եկեք այսպես անենք: Ես մի քննադատ մինչ օրս Հայաստանում չեմ տեսել, որ ասի՝ ուզում եք սա անել, առաջարկում եմ այս ճանապարհով անել»:
Ճարտարապետը նշեց, որ բազմաթիվ քաղաքացիներ` ճարտարապետներ, բժիշկներ, հասարակ մարդիկ, այցելել են քաղաքապետարան, առաջարկներ են արել` ինչպես ավելի հեշտ լուծել խնդիրը, և դրանցից մի քանիսը հիմա քաղաքապետարանում քննարկվում են: