«Նուբարաշեն» քրեակատարողական հիմնարկի կալանավորներից մեկը, ցմահ ազատազրկման դատապարտված Էմիլ Վերդյանը հացադուլ է հայտարարել: Ինչպես PanARMENIAN.Net-ի թղթակցին է հայտնել ՀՀ արդարադատության նախարարության քրեակատարողական վարչության մամլո ծառայության ղեկավար Գոռ Ղլեչյանը, հացադուլ հայտարարելով, Վերդյանը ցանկանում է բողոքարկել դատավճիռը: Նա հայտնել է նաև, որ կալանավորը դեռևս ոչ մի պահանջ չի ներկայացրել և գտնվում է իր բանտախցում:
Մայիսի 23-ին ԱԺ-ի կողմից ընդունված «ՀՀ Քրեական օրենսգրքում փոփոխություններ կատարելու» մասին օրենքով ազատազրկման առավելագույն պատժաչափը սահմանվեց 20 տարի՝ նախկին 15 տարվա փոխարեն: Ցմահ դատապարտյալների մասով այն միանշանակ մեղմացում է, հետևաբար, պիտի ունենա հետադարձ ուժ. այս տեսակետն են հայտնում որոշ իրավաբաններ:
Գործերի վերանայման տրամաբանությունը հետևյալն է: Եթե ներկայիս ցմահ դատապարտյալները, որոնցից 42-ը նախկին մահապարտներն են, դատապարտվեին մեր օրերում, միգուցե նրանց արարքին համարժեք լիներ ոչ թե ցմահ ազատազրկումը, այլ 16, 17... այսինքն` մինչև 20 տարի պատժաչափը, ինչպես որ նախատեսում է ներկայիս օրենքը: Հետևաբար այն մեղմացում է: Սակայն, ինչպես PanARMENIAN.Net-ի թղթակցին է հայտնի դարձել լավատեղյակ աղբյուրներց, մի քանի քրեական գործ ձևական քննվել ու պատիժները անփոփոխ են մնացել: Ցմահ դատապարտյալ Էմիլ Վերդյանի բողոքն ուղղված է հենց օրենքի փոփոխության ընձեռած բացառիկ հնարավորությունը չկիրառելու կամ ձևականորեն կիրառելու դեմ: Նա պահանջում է սկսել գործերի ռեալ ու անհատական վերանայումներ, որոնց արդյունքում, ինչպես օրենքն է թույլ տալիս, նշանակվեն առանձին պատժաչափեր կոնկրետ տարիների տեսքով:
Բանն այն է, որ մի քանի ցմահ դատապարտյալներ արդեն իսկ դիմել են Էրեբունի Նուբարաշեն վարչական շրջանների ընդհանուր իրավասության դատարան ու ստացել միանման մերժումներ՝ պատիժը թողել անփոփոխ՝ ցմահ դատապարտություն: Էմիլ Վերդյան դեռ պատասխան չի ստացել, սակայն մտավախություն ունի, որ կրկնվելու է նույնը: Չի բացառվում, որ Էմիլ Վերդյանին միանան նաև ուրիշ ցմահ դատապարտյալներ:
Ինչպես PanARMENIAN.Net-ի թղթակցին են հայտնել Էրեբունի Նուբարաշեն վարչական շրջանների ընդհանուր իրավասության դատարանում, բողոքները ստացվում են ամեն օր: «Պատահում է, որ օրը ստացվում է 5, 10 կամ մեկ բողոք»,-ասել է գործակալության զրուցակիցը:
