«Չենք լռելու» երիտասարդական նախաձեռնությունը սկսում է ահազանգների նոր շարք` «Բնություն, թե՞ բիզնես» ընդհանուր խորագրով:
«Բազմաթիվ փորձագետներ Հայաստանի էկոլոգիական վիճակն ընդհանուր առմամբ անմխիթար են գնահատում: Չնայած համապատասխան ռազմավարության, օրենսդրության և պետական ծրագրերի, մեր երկրում բիզնեսի շահերը, որպես կանոն, գերակշռում են բնության պահպանման բացարձակ արժեքին»,- ասվում է նախաձեռնության տարածած հաղորդագրության մեջ:
Նախօրեին «Չենք լռելու»-ի մի խումբ անդամներ արշավի էին մեկնել դեպի Դիլիջան: Երիտասարդները նկատել են, թե ինչպես են Կիրանցի վանքի շրջակայքում գտնվող անտառից դուրս գալիս փայտով լի բեռնատարներ: Նախաձեռնությունից հայտնում են, որ դրանցից որևէ մեկի վրա պետհամարանիշ չի եղել:
Երիտասարդները հասցրել են լուսանկարել դրանք և ցույց տալ դենդրոլոգի, ով հաստատել է ծառերի առողջ լինելու փաստը: Դա տվյալ դեպքում բացառում է «սանիտարական ծառահատումներ» քողի գործածումը, ինչպես արվում է սովորաբար: Դենդրոլոգը հավելել է նաև, որ Դիլիջանի անտառներում աճող ծառերը, որպես կանոն, օգտագործվում են մանրահատակ պատրաստելու համար:
