Հ.Պարոնյանի անվան երաժշտական կոմեդիայի պետական թատրոնի դերասանուհի Զարուհի Խաչատրյանը Ուկրաինայի Խմելնիցկի քաղաքում կայացած մոնոներկայացումների «Վիդլունիա» 12-րդ միջազգային փառատոնին արժանացել է «Ազգային բնութագրի լավագույն մարմնավորում» անվանակարգի դիպլոմին, հայտնում է ՀՀ մշակույթի նախարարության պաշտոնական կայքը: Փառատոնին, Խաչատրյանը ներկայացել է Կարինե Խոդիկյանի «Վերադառնում եմ, մոռացեք...» ներկայացումով (ռեժիսոր Տաթև Հակոբյան): 350 հանդիսատեսի համար նախատեսված լեփ-լեցուն դահլիճի ու փառատոնի պատվավոր հյուրերի կողմից Խաչատրյանի խաղը շատ բարձր է գնահատվել: Ներկայացումից հետո անցկացված քննարկմանը, որին մասնակցել են տարբեր երկրների ոլորտի պատասխանատուներն ու պրոֆեսիոնալները, դրվատանքով են անդրադարձել Զարուհի Խաչատրյանի դերասանական խաղին ու բեմական խոսքին:

«Վիդլունիա» փառատոնը կայացել է օգոստոսի 24-30-ը: Փառատոնին մասնակցել են աշխարհի 11 երկրների` Ուկրաինայի, Ռուսաստանի, Բելառուսի, Իսրայելի, Կիրգիզիայի, Լիտվայի, Ֆրանսիայի, Լեհաստանի, Գերմանիայի, Էստոնիայի և Հայաստանի ներկայացուցիչներ: