Համաշխարհային հանրությունն իր համար փակել է մարտի 1-ի ողբերգական իրադարձությունների «էջը» դեռ 2008-ին: Այդ մասին Երևանում մամլո ասուլիսում հայտարարել է ՀՀ ԱԳՆ նախկին ղեկավար Արման Մելիքյանը: «Համաշխարհային հանրությունն իր վրայից հանել է Հայաստանի համար պատասխանատվությունը դեռ այդ ժամանակ»,- ասել է նա: Մելիքյանի խոսքով, միջազգային կառույցների նպատակը միայն իրավիճակի մեղմացումն է և նոր սրումներ թույլ չտալը: Միաժամանակ նա նշել է, որ «դա նրանց համար փակ էջ է, իսկ Հայաստանի համար այդ էջը դեռ փակված չէ: Այդ էջը չի փակվի, քանի մենք չենք կարող Հայաստանում ձևավորել վստահություն վայելող իշխանություն»,- ասել է Մելիքյանը:

Սեպտեմբերի 8-ին տեղի ունեցած ԵԽԽՎ հերթական նստաշրջանի ընթացքում ներկայացվել է դիտարկման խմբի անդամներ Ջոն Փրեսկոտի և Աքսել Ֆիշերի զեկույցը, որում հանձնաժողովը ողջունել է ուժերին, որոնք քաղաքական կամք են դրսևորել այդ հարցի լուծման հարցում ԵԽ նորմերին համապատասխան:

«Իրավական և իրավապաշտպան ոլորտներում բարեփոխումները հիմք են ստեղծում երկրում ժողովրդավարական և արդար խորհրդարանական ընտրություններ անցկացնելու, մամուլի ազատության և ժողովրդավարական սկզբունքներ հաստատելու համար»,- ասվում է ուղերձում: Հուլիսին համզեկուցող Աքսել Ֆիշերն այցելել է Երևան, իսկ Ջոն Փրեսկոտը, որը պետք է նրա հետ ժամաներ Հայաստան, ինքնաթիռից ուշացել էր:

Այցի ընթաքում Ֆիշերը ողջունել է ՀԱԿ և իշխող կոալիցիայի միջև երկխոսությունը: «Ես շատ գոհ եմ երկխոսության գործընթացը սկսելուց, ինչը ԵԽԽՎ վաղեմի ցանկությունն է»,- ասել է նա այցի ավարտին: