Հայաստանի մարդու իրավունքների պաշտպան Կարեն Անդրեասյանը դժգոհություն է հայտնել ոստիկանության հետ համագործակցությունից: «Եթե պաշտպանության նախարարությունը որոշակի հույս է ներշնչում, ապա ոստիկանության դեպքում դա այդպես չէ»,-հայտարարել է նա ՀՀ մասին խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման մասին Եվրոպական կոմիտեի զեկույցի (CPT) և ՄԻՊ գործունեությունը որպես Ազգային կանխարգելիչ մեխանիզմ թեմայով քննարկումների ժամանակ: Նրա խոսքով, ոստիկանության աշխատանքը կարելի է բացասաբար գնահատել ոչ միայն համակարգային խնդիրների, այլ նաև ՀՀ օմբուդսմենի հետ համագործակցության ծավալի պատճառով: «Ոստիկանության մոտ մենք չենք տեսնում մեզ հետ համագործակցելու ցանկություն, ՊՆ-ում նման ցանկություն կա»,-ասել է նա:
Օմբուդսմենը քննադատել է ոստիկանությանը՝ հայտարարելով, որ այն չունի հետաքննության և հարցաքնություններ վարելու որակյալ համակարգ ու տեխնիկա: «Դա հատուցվում է մարդկանց հանդեպ բռնությամբ»,-նշել է նա՝ հավելելով, որ ոմանք նույնիսկ չեն ցանկանում դադարեցնել բռնությունը, քանի որ դա կհարվածի նրանց գրպանին: Ընդ որում, նա նշել է, որ պետական կառույցները կոնկրետ պատասխաններ են տալիս Եվրոպական հարցումներին որոշ հարցերում, սակայն կան հարցեր, որոնցից փորձում են խուսափել: Օրինակ, ի պատասխան Եվրոպական կոմիտեի դիմումին, որ ոստիկանությունում կոռուպցիա կա, պետական կառույցները պատասխանում են, որ անց են կացվում թրենինգներ: «Ես չգիտեմ,, թե մեր երկրի քանի քաղաքացի է հավատում, որ թրենինգի միջոցով վերացնում են կոռուպցիան, ես անձամբ դրան չեմ հավատում»,-ասել է օմբուդսմենը:
