Այսօր ադրբեջանական լրատվամիջոցները հրապարակել են Ռուսաստանի արտաքին գործերի նախարար Սերգեյ Լավրովի հայտարարությունը, որտեղ նա, իբր, ասել է, որ ղարաբաղյան հիմնահարցը քննարկվելու է ՄԱԿ-ում: Ավելին, ադրբեջանական ԶԼՄ-ները հղում են կատարել Ռոսիա 24 ռուսական հեռուստաալիքին: Սակայն, դատելով մամլո ասուլիսի սղագրությունից, Լավրովը նման հայտարարություն չի կատարել: Մամլո ասուլիսի ընթացքում Ռուսաստանի և Ֆինլանդիայի ԱԳ նախարարներն անդրադարձել են երկրների երկկողմ հարաբերություններին, որից հետո` ՄԱԿ առաջիկա աշնանային նստաշրջանին` ընդգծելով պաղեստինյան հիմնահարցի կարևորությունը, որը ՄԱԿ ԳԱ օրակարգի հիմնական հարցերից մեկն է լինելու:
Լեռնային Ղարաբաղի հակամարտության մասին միակ հիշատակումը եղել է Լավրովի հայտարարությունը ղարաբաղյան հակամարտության կարգավորման գործընթացում ռուսական միջնորդության հաջողությունները Ֆինլանդիայի ԱԳ նախարարին ներկայացնելու մասին: «Այսօր մենք մեր գործընկերների հետ կիսվեցինք ղարաբաղյան և մերձդնեստրյան կարգավորումներում փոխզիջումների որոնումներին Ռուսաստանի մասնակցության մասին տեղեկատվությամբ: Պատմել ենք նաև Հարավային Կովկասում իրադրության ռուսական գնահատականների մասին: Մեր երկրներին հուզում է այն, թե ինչպես են զարգանալու իրադարձությունները Մերձավոր Արևելքում և Հյուսիսային Աֆրիկայում: Մոտենում է ՄԱԿ Գլխավոր ասամբլեայի նստաշրջանը, որում պաղեստինյան հիմնախնդրին առանցքային տեղերից մեկն է հատկացված»,- ասել է Լավրովը:
