Քադդաֆիի որդին ապաստան է ստացել Նիգերում

PanARMENIAN.Net - Լիբիայի առաջնորդ Մուամար Քադդաֆիի որդիներից մեկը` Սաադին ապաստան է ստացել Նիգերում, հաղորդում է BBC News-ը:

Նիգերի արդարադատության նախարար Մարու Ամադուի խոսքով, Քադդաֆիի որդուն թույլ են տվել մուտք գործել երկիր հումանիտար հիմունքներով, սակայն թե ինչ է ենթադրվում այդ ձևակերպման ներքո, նա չի ճշտել:

Փետրվարի կեսին Լիբիայում սկսվեցին բողոքի ցույցերը, որոնց մասնակիցները պահանջում էին 40 տարի իշխող Մուամար Քադդաֆիի հրաժարականը, որոնք վերաճեցին ռազմական դիմակայության կառավարական ուժերի և ապստամբների միջև: Մարտի 17-ին ՄԱԿ-ի ԱԽ-ն բանաձև ընդունեց, որով նախատեսվում էր թռիչքներից զերծ գոտի ստեղծել Լիբիայի երկնքում և թույլատրվում էր ցանկացած միջոց կիրառել խաղաղ բնակչությանը պաշտպանելու համար: Մարտի 19-ին մեկնարկած գործողությունը ստացավ «Արևածագ. Ոդիսական» անվանումը. ՆԱՏՕ-ի դաշնակցական զինված ուժերը գնդակոծում են Քադդաֆիի ռազմավարական օբյեկտները: Լիբիայում գործողության ղեկավարությունը մարտի 31-ին ամբողջությամբ անցավ ՆԱՏՕ-ի հրամանատարության ներկայացուցիչներին: Գործողության ժամկետը սպառվում էր հունիսի 27-ին, սակայն հունիսի 1-ին ՆԱՏՕ-ն երկարացրեց գործողությունը 90 օրով` մինչև սեպտեմբերի վերջ: