WikiLeaks-ի հրապարակումներն այն մասին, որ Օսմանյան կայսրության ժամանակաշրջանի արխիվները «մաքրել են» Հայոց ցեղասպանության փաստին վերաբերող փաստաթղթերից, կարող են օգնել թուրքական ԶԼՄ-ներին պայքարել թուրքական իշխանությունների PR-ի դեմ, որոնք պնդում են, թե ի տարբերություն հայերի, նրանք բացել են սեփական արխիվները: Այդ մասին Երևանում կայացած մամլո ասուլիսում հայտարարել է թուրքագետ Անուշ Հովհաննիսյանը:

Ըստ նրա, հայկական կողմը բազմիցս է հայտարարել, որ հայկական արխիվները բաց են Հայոց ցեղասպանությանը վերաբերող փաստաթղթերն ուսումնասիրողների համար: Նա նշել է, որ WikiLeaks-ի հրապարակումները կհանդարտեցնեն թուրքական իշխանություններին, որոնք պնդում են, որ Ցեղասպանության փաստն ապացուցելու համար պետք է հետազոտել թուրքական արխիվները: «Առավելագույնը, ինչ կարող են անել թուրքական իշխանությունները, որոշ երանգներ ավելացնել 1915թ. իրադարձությունների մասին տեղեկություններին, սակայն, չեն կարող դեմ դուրս գալ բազմաթիվ ապացույցներին ու վկայություններին»,-ասել է նա:

Նա նշել է, որ արխիվների փաստաթղթերի ոչնչացման մասին տեղեկությունը նորություն չէ:

WikiLeaks-ի հրապարակած ԱՄՆ Պետդեպարտամենտի գաղտնի հեռագրերի թվում կար թուրքական Սաբանջի համալսարանի պրոֆեսոր Հալիլ Բերքթայի ուղերձը Ստամբուլի Ամերիկյան խորհրդին:

2004թ. հուլիսի 12-ի նամակում պրոֆեսորը հաղորդում է ամերիկյան պետծառայողին այն մասին, որ «զտումներ են կատարվել» Օսմանյան կայսրության ժամանակաշրջանին վերաբերող արխիվաներում՝ վերացնելով Հայոց ցեղասպանության մասին ապացույցները: «1918թ. ի վեր արխիվները «զտվել են» մի քանի անգամ: Առաջին անգամ դա տեղի ունեցավ, երբ Անտանտայի դաշնակից ուժերը գրավեցին Ստամբուլը»,-հայտարարել է թուրքական համալսարանի պրոֆեսորը: