Հոկտեմբերի 28-ին և 29-ին Հրաչյա Ղափլանյանի անվան դրամատիկական թատրոնում տեղի է ունենալու թատրոնի ղեկավար Արմեն Խանդիկյանի և թատերագետ Լևոն Մութաֆյանի համատեղ «Ձուկն առանց ջրի, կամ SUICIDE» պիեսի առաջնախաղը: Այն նվիրվելու է ՀՀ ժողովրդական արտիստ, պետական մրցանակի դափնեկիր, համաշխարհային կինոյում և թատերական աշխարհում իր մշտական տեղը հաստատած մեծ դերասան Վլադիմիր Մսրյանի հիշատակին:

Պիեսն ամբողջապես կառուցված է Վլադիմիր Մսրյանի դերասանական առանձնահատկությունների վրա: Թատրոնում անհամբերությամբ էին սպասում բեմադրության առաջնախաղին` վայելելու ականավոր դերասանի տաղանդի նոր դրսևորումը: Սակայն փորձերն ընդհատվեցին դերասանի մահվան պատճառով: Սակայն պիեսի հեղինակները չկամեցան մոռացության մատնել դրամատիկական ստեղծագործությունը և գլխավոր հերոսի` Բարդուղիմիոսի դերում հանդես կգա ՀՀ ժողովրդական արտիստ Արթուր Ութմազյանը:

Վլադիմիր Մսրյանը ծնվել է 1938թ. մարտի 12-ին Վլադիկովկասում: 1958-62 թթ. սովորել է Երևանի գեղարվեստաթատերական ինստիտուտում: 1963-64թթ. աշխատել է Պատանի հանդիսատեսի թատրոնում, 1964-66թթ.` Երևանի Ստանիսլավսկու անվան Ռուսական թատրոնում, 1966-ից` Երևանի դրամատիկական թատրոնում: Մսրյանը նկարահանվել է 19 ֆիլմերում:

Համամիութենական մասշտաբով նա անվանի դարձավ «Նիկոլո Պագանինի» ֆիլմից հետո: Մահացել է 2010 թ-ի օգոստոսի 24-ին արյան քաղցկեղից: