Հայաստանի նախագահ Սերժ Սարգսյանը հոկտեմբերին պետական այցով կմեկնի Ռուսաստան: Ինչպես հաղորդում է Կրեմլի պաշտոնական կայքը, սեպտեմբերի 14-ին կայացել է Ռուսաստանի նախագահ Դմիտրի Մեդվեդևի և Հայաստանի նախագահ Սերժ Սարգսյանի հեռախոսազրույցը: Հայաստանի նախագահը զանգահարել է, որպեսզի Ռուսաստանի նախագահին շնորհավորի տարեդարձի առթիվ: Դմիտրի Մեդվեդևը շնորհակալություն է հայտնել շնորհավորանքների և բարեմաղթանքների համար:
Զրույցի ընթացքում պետությունների ղեկավարները նշել են այս տարվա հոկտեմբերին Սերժ Սարգսյանի` Ռուսաստան ծրագրված այցի նախապատրաստման կարևորությունը:
Պետական այցը արտերկրի ղեկավարների այցի գերագույն տեսակն է: Միջոցառումների, արարողակարգերի և պաշտոնական անձանց մակարդակի արձանագրային տեսակետից այն առավել լիակատար է: Արտերկրի ղեկավարը իր իշխանական լիազորությունների անընդմեջ կատարման ընթացքում կարող է մեկ այլ երկիր պետական այցով մեկնել միայն մեկ անգամ: