ՌԴ Սվերդլովսկի շրջանի Արտյոմովսկ քաղաքում ոստիկանների կանխած զանգվածային ծեծկռտուքը, որի մասնակիցները զինված էին կացիններով, մականներով ու հրազենով, քաղաքի երկու խոշորագույն սլավոնական խմբավորումների հավաք էր: Ըստ ոչ պաշտոնական տվյալների, «Կոմերսանտին» հայտնի է դարձել, որ Արտյոմովսկի սլավոնական խմբավորումները ցանկանում էին միավորվել հայկական հանցավոր խմբավորման դեմ, որն այժմ վերահսկում է քաղաքի բիզնեսի առավել շահավետ ոլորտները: Աղբյուրները չեն բացառում, որ «սլավոնականների» հավաքի մասին իրավապահներին հենց հայերն են հայտնել:
Մյուս վարկածով, որը հաղորդում է «Իզվեստիան», դա կազակների ոչ պաշտոնական միավորման ու Լեսնոյ շրջանի երիտասարդական խմբավորման հանդիպում է եղել, որտեղ խմբավորումների առաջանորդները որոշել են վերջ դնել դիմակայությանը:
Ըստ պաշտոնական տվյալների, գիշերը հատուկ նշանակության ստորաբաժանումների աշխատակիցները կասեցրել են զանգվածային ծեծկռտուքը Արտյոմովսկում: Բոլոր մասնակիցները բերման են ենթարկվել: Ոստիկանությունում հայտնել են, որ ծեծկռտուքի պատճառը առաջնություն հաստատելու համար պայքարն է:
Բոլոր ձերբակալվածներին հաջորդ օրն ազատ են արձակել: