Ադրբեջանի ԱԳ նախարար Էլմար Մամեդյարովը մի շարք երկկողմ հանդիպումներ է ունեցել ՄԱԿ-ի ԳՎ 66-րդ նստշրջանի ընդհանուր քննարկումների շրջանակում:
Առաջին հանդիպումը տեղի ունեցավ Ուրուգվայի ԱԳ նախարար Լուիս Ալմագրոյի հետ, հայտնում է Trend գործակալությունը՝ հղում անելով Ադրբեջանի ԱԳՆ մամլո ծառայությանը: Հանդիպմանը կարծիքներ են փոխանակվել երկկողմ հարաբերությունների զարգացման շուրջ:
Մամեդյարովը «մանրամասն իրազեկել է» Ուրուգվայի ԱԳՆ ղեկավարին ղարաբաղյան հակամարտության շուրջ իրավիճակի մասին:
Ինչպես հաղորդում է Ադրբեջանի ԱԳՆ-ն, Ալմագրոն նշել է, որ Ուրուգվայը կողմ է, որ ղարաբաղյան հիմնախնդիրը լուծվի միջազգային նորմերի հիման վրա:
Սեպտեմբերի սկզբին Ալմագրոն հայտարարեց, որ Ղարաբաղը Հայաստանի պատմական մասն է և պետք է միանա նրան սեղմ ժամկետներում : Նախարարն ընդգծեց, որ Ուրուգվայի իշխանություններն աշխատում են ղարաբաղյան կարգավորման վերաբերյալ պաշտոնական դիրքորոշման մշակման ուղղությամբ:
