«Ենի Ազերբայջան» իշխող կուսակցության ակտիվիստների մի խումբ պիկետ է անցկացրել Խաղաղության եւ դեմոկրատիայի ինստիտուտի գրասենյակի առջեւ, որի ղեկավարն է իրավապաշտպան Լեյլա Յունուսը: Ինչպես տեղեկացնում են ռուսաստանյան ԶԼՄ-ները, նրանք բողոքել են օրերս Լեռնային Ղարաբաղ այցելած իրավապաշտպան Էլդար Զեյնալովի հետ Լեյլա Յունուսի համագործակցության դեմ: Պիկետի մասնակիցները պահանջել են երկրից արտաքսել Լեյլա Յունուսին, Էլդար Զեյնալովին եւ ուրիշ իրավապաշտպանների: Օրերս կուսակցության ակտիվիստները նմանօրինակ ակցիա են կազմակերպել նաեւ Էլդար Զեյնալովի գրասենյակի առջեւ, որի դեմ վերջերս իշխանամետ ԶԼՄ-ներն հալածանք են ծավալել: Ակցիայի մասնակիցները «Դուրս կորիր Ադրբեջանից» կարգախոսով հարձակում էին ձեռնարկել գրասենյակի վրա, ինչին հրահրել էին Բաքվի նախկին դատախազ, այժմ «Մուսավաթ» ընդդիմադիր կուսակցության առաջնորդ Չինգիզ Գանիեւի հեռուստատեսությամբ արված կոչերը` «պատժել թշնամիներին»: