«Մակեդոնիայի հետ հանդիպմանը մենք պետք է խաղանք հանգիստ, հավաքված և միայն հաղթանակի համար: Վերջին երկու խաղերի նման մեր թիմը շատ լավ է տրամադրված: Մենք չպետք է մտածենք` խաղը բարդ կլինի, թե ոչ, ուղղակի պետք է խաղալ»,- PanARMENIAN.Net-ի թղթակցի հետ զրույցում ասել է Հայաստանի հավաքականի հարձակվող Մարկոս Պիզելին, որը Երևան է ժամանել հոկտեմբերի 3-ին:
Հայաստանի հավաքականը ֆուտբոլի ակադեմիայում սկսել է պատրաստվել 2012-ի Եվրոպայի առաջնության ընտրական մրցաշարի Մակեդոնիայի հետ խաղին, որը կայանալու է հոկտեմբերի 7-ին: B խմբում Հայաստանի հավաքականը 14 միավորով զբաղեցնում է 3-րդ տեղը` Իռլանդիային զիջելով 1 միավորով:
Պիզելին խոստովանել է, որ տվյալ պահին չի մտածում խմբից դուրս գալու մասին. «Մեր առաջին խնդիրն է հաղթել Մակեդոնիային: Մենք դաշտ դուրս կգանք միայն երեք միավորի համար և 90 րոպե մեր երկրպագուներին կցուցադրենք որակյալ ու լավ խաղ»: