Արցախի Հանրապետության նախագահ Բակո Սահակյանը հոկտեմբերի 8-ին մասնակցել է Ստեփանակերտում մեկնարկած «ԼՂՀ երկրաբանությունը և հանքային պաշարները» գիտաժողովին:
Բակո Սահակյանը ողջունել է հանրապետությունում առաջին անգամ նման թեմայով միջոցառման կազմակերպումը՝ նշելով, որ Արցախի հանքային պաշարների ուսումնասիրությունը մեծ տեղ է գրավում երկրի սոցիալ-տնտեսական զարգացման գործում:
Երկրի ղեկավարը կարևորել է նաև Հայաստանի և Սփյուռքի գիտական ներուժի ներգրավումը, ինչը թույլ կտա նոր որակ հաղորդել ինչպես հանրապետությունում երկրաբանության ու հանքային պաշարների հետազոտության, այնպես էլ այդ ուսումնասիրությունների պրակտիկ կիրառման գործընթացին:
Գիտաժողովին մասնակցում էին վարչապետ Արա Հարությունյանը, Ազգային ժողովի պատգամավորներ և կառավարության անդամներ, հանրապետությունում գործող արդյունաբերական ձեռնարկությունների և գիտակրթական ոլորտի ներկայացուցիչներ, հաղորդում է Արցախի Հանրապետության նախագահի աշխատակազմի տեղեկատվության գլխավոր վարչությունը:
