Հայաստանը գործադրում է բոլոր ջանքերը պարենային անվտանգության մակարդակը բարձրացնելու համար

 12 հոկտեմբերի 2011 - 14:15 AMT

PanARMENIAN.Net - Հայաստանը մտադիր է առաջիկա տարիներին պարենային անվտանգության մակարդակը հասցնել 80 տոկոսի: Այդ մասին Երևանում լրագրողներին հայտարարել է Հայաստանի գյուղատնտեսության նախարար Սերգո Կարապետյանը: Ինչպես հաղորդել է նախարարը, Հայաստանի նախագահ Սերժ Սարգսյանի հանձնարարությամբ մշակվել և հաստատվել է 2010-2012թթ. պարենային անվտանգության անվտանգության հայեցակարգը: «Այսօրվա դրությամբ Հայաստանում պարենային ինքնաապահովման մակարդակը կազմում է շուրջ 60 տոկոս: Մենք ցանկանում ենք առաջիկա տարիներին այդ ցուցանիշը հասցնել 80 տոկոսի»,- ասել է նա: Այդ առումով նախարարը նշել է, որ «դա շատ բարձր ցուցանիշ է, սակայն մենք անպայման պետք է հասնենք դրան»:

Նախարարի խոսքով, գյուղատնտեսության ոլորտում կան ուղղություններ, որտեղ այդ մակարդակը բարձր չէ, մասնավորապես, դա վերաբերվում է հավի մսի արտադրությանը: «Հայաստանը ներկրում է մեծ քանակությամբ հավի միս, քանի որ կարող է բավարարել ներքին պահանջարկի ընդամենը 37 տոկոսը»,- ասել է նա: Սերգո Կարապետյանը հաղորդել է, որ այդ մթերքով սեփական ապահովվածությունը բարձրացնելու համար մշակվել է հատուկ ծրագիր, որը թույլ է տալու առաջիկա տարիներին հասցնել այդ ցուցանիշը 60 տոկոսի: Միաժամանակ նա հավելել է, որ երկրում հացահատիկային կուլտուրաների ինքնաապահովման ցուցանիշը հասել է 55-60 տոկոսի նախկին 40 տոկոսի փոխարեն:

Պարենային անվտանգության հայեցակարգի ընդունումը լուրջ հիմքեր է ստեղծում տեղական արտադրությունը խթանելու համար, հատկապես գյուղատնտեսական արտադրանքի ոլորտում: