Կարելի է վստահաբար ասել, որ 9-րդ միջազգային թատերական «Հայֆեստ» փառատոնը հաջող անցավ, մեզ հաջողվեց իրականացնել այն ամենն, ինչ մենք մտադիր էինք»,-Երևանում կայացած մամլո ասուլիսում հայտարարել է «Հայֆեստ» փառատոնի նախագահ Արթուր Ղուկասյանը: Ըստ նրա, փառատոնի հանդիսատեսին հայկական ներկայացումներից հատկապես դուր եկան «Միհր» թատրոնի ներկայացումները, ինչպես նաև ուսանողների բեմադրությունները:
Ղուկասյանը նշել է, որ արտերկրի մասնակիցներից հայ հանդիսատեսը առանձնացրեց բրիտանացի խորեոգրաֆ Բիլլի Քոուիի 3D ձևաչափով «Tango de Soledad» («Միայնության տանգո») ներկայացումը:
Փառատոնի նախագահը հայտնեց նաև, որ հայ հանդիսատեսին չտպավորեց չեխական թատրոնի ելույթը:
Սակայն, ըստ Ղուկասյանի, փառատոնում ամեն ինչ չէ, որ սահուն անցավ: «Ընտանեկան խնդիրների պատճառով չկարողացավ ժամանել դանիացի ռեժիսորը, հայ-վրացական մայրուղում սողանքի պատճառով չկարողացավ ժամանել վրացական թատերախումբը, մենք նաև չկարողացանք բացօթյա ներկայացում անցկացնել Ազատության հրապարակում՝ ՀԱԿ հանրահավաքների պատճառով»,-ասել է նա:
9-րդ միջազգային թատերական «Հայֆեստ» փառատոնը, որն անցնում էր հոկտեմբերի 1-8, այս տարի ընդունեց 30 թատերական խմբերի 60 ներկայացումներով աշխարհի 16 երկրներից: Ներկայացվեցին տիկնիկային, երաժշտական, խորեոգրաֆիկ ներկայացումներ, ինչպես նաև այլ բեմադրություններ, մասնակցեցին թատրոններ Իտալիայից, Ֆրանսիայից, Լատվիայից, Բուլղարիայից, Դանիայից, Մեծ Բրիտանիայից ու այլ երկրներից:
