«Խաղաղության այգի» մշակութային նախագիծն իրականացվել է «Արևորդի» 3-րդ միջազգային բնապահպանական փառատոնի շրջանակում և նվիրված էր Երևանի կենդանաբանական այգու հիմնադրման 70-ամյակին:
Ծրագրին մասնակցում էին 5 արվեստագետներ 4 երկրներից: Նախագծին մասնակցել են Վեհբի Մանգտայը Թուրքիայից, Ցվետանկա Կոյկովան Բուլղարիայից, Յանուշ Լամրը Չեխիայից, Գոհար Կարապետյանը և Դավիթ Նուբարյանը Հայաստանից: Փառատոնի հրավերով նրանք ժամանել էին Հայաստան և փառատոնի մեկնարկից առաջ սկսել էին իրենց աշխատանքները:
Նախագիծն իրականացվում էր Արքայազն Կլաուսի անվան Նիդեռլանդների մշակույթի և զարգացման հիմնադրամի աջակցությամբ: Ծրագրի նպատակն էր մասնակիցներին և այցելուներին ներգրավել ստեղծագործական մի եռուզեռի մեջ, որի հիմքում ընկած են կենդանիների բարեկեցության, ինչպես նաև մարդկանց և կենդանիների խաղաղ համակեցության գաղափարները: Հոկտեմբերի առաջին օրերից կենդանաբանական այգու այցելուները բացառիկ հնարավորություն են ունեցել հետևելու ընթացող ստեղծագործական աշխատանքներին և քննարկելու դրանք հեղինակների հետ:
Միջոցառումն ամփոփեց ոչ միայն «Խաղաղության այգի» նախագիծը, այլև «Արևորդի» փառատոնն ընդհանուր առմամբ:
