Հայաստանում ներդրվել է շենգենյան գոտում կարճաժամկետ արտոնագրեր ստանալու նոր տեղեկատվական համակարգ: «Նոր համակարգը կոչված է նվազեցնելու սահմանի անօրինական հատման հնարավորությունը, ինչպես նաև բարձրացնելու սահմանների անվտանգությունը»,- Հայաստանում Լեհաստանի դեսպանատանը փորձնական նախագծի շնորհանդեսի ժամանակ հայտնել է Հայաստանի Հանրապետությունում Եվրամիության առաջին խորհրդական Օննո Սիմոնսը:
Համակարգն իր մեջ ներառելու է քաղաքացիների կենսաբանական տվյալները, այն է` մատնահետքերն ու լուսանկարը: Միասնական տեղեկատվական համակարգը թույլ կտա Շենգենի ողջ գոտու տարածքում հետևել և կանխել սահմանի անօրինական հատումը:
Մատնահետքերը չեն վերցնելու միայն 12 տարեկանից ցածր երեխաներից և դիվանագիտական անձնագիր ունեցող քաղաքացիներից: Նախագծի ներդրման ավարտը ծրագրված է 2012թ. մայիսին: