Պայքարն իր վերջին դինամիկ փուլն է մտնում: Այդ մասին հայտնել է ՀԱԿ-ի առաջնորդ Լևոն Տեր-Պետրոսյանը` ելույթ ունենալով հոկտեմբերի 28-ին ընդդիմության հանրահավաքի ժամանակ Ազատության հրապարակում:
«Այսօր սկիզբ է դրվում մեր վերջնական հաղթանակին, և ես համոզված եմ, որ այս անգամ ժողովուրդը բաց չի թողնի հաղթանակն իր ձեռքից»,- ասել է նա: Ընդ որում, Տեր-Պետրոսյանը հավելել է, որ իր վստահությունը հիմնվում է այն բանի վրա, որ այսօրվա իշխանությունն այն չէ, ինչ 4 տարի առաջ էր: «Դուք միակ ժողովուրդն եք, որն ընտրություններից չորս տարի անց նույն եռանդով և վճռականությամբ պայքարում է իր իրավունքների համար»,- ընդգծել է Կոնգրեսի ղեկավարը:
Տեր-Պետրոսյանի խոսքով` հանրահավաքին մասնակցել է մի քանի հազար մարդ: ՀԱԿ-ի հաջորդ հանրահավաքը տեղի կունենա նոյեմբերի 20-ին: Ինչպես նշել է ՀԱԿ-ի առաջնորդը, հերթական հանրահավաքի ժամանակ կներկայացվեն ընդդիմադիրների հաջորդ քայլերը:
Ցուցարարները հեռացել են հրապարակից և երթով շարժվում են քաղաքի կենտրոնական փողոցներով:
