«Ես՝ որպես քաղաքապետի առաջին տեղակալ և Երևանի Ավագանու Խորհրդի անդամ, հայտարարում եմ, որ մենք կշարունակենք բոլոր սկսած ծրագրերը, քանի որ դրանք նաև ՀՀԿ նախընտրական ծրագրերն են: Կանցկացվեն քաղաքապետի ընտրություններ, և ես վստահ եմ, որ մեկնարկած և իրականացման գործընթացում գտնվող բոլոր ծրագրերը կշարունակվեն»,- հոկտեմբերի 30-ին լրագրողներին է հայտնել Երևանի քաղաքապետի պաշտոնակատար Տարոն Մարգարյանը: Խոսելով այս կամ այն ծրագրերի առաջնահերթության մասին՝ նա ընդգծել է, որ մայրաքաղաքում իրականացվող բոլոր նախագծերն առաջնահերթ են:
Մեկնաբանելով Կարեն Կարապետյանի հրաժարականը և հավանական թեկնածությունը քաղաքապետի պաշտոնին՝ փոխքաղաքապետն ասել է, որ դա կորոշեն ՀՀԿ Խորհուրդն ու պետության նախագահ Սերժ Սարգսյանը: Միաժամանակ Տարոն Մարգարյանը նշել է, որ Կարապետյանն իր հայտարարության մեջ հստակ նշել էր, թե ինչու է հրաժարական տալիս, և դա բոլորովին պայմանավորված չէ կրպակների ապամոնտաժման խնդիրներով, «մնացած խոսակցություններն անհիմն են»:
Այս կապակցությամբ նա հավելել է, թե «որպես փոխքաղաքապետ` ես կողմնակից եմ Աբովյան փողոցում բոլոր կրպակների ապամոնտաժմանը, մենք այս ծրագիրը պետք է իրականացնենք»:
«Երևան քաղաքի տեղական ինքնակառավարման մասին» ՀՀ օրենքի 45-րդ հոդվածի 2-րդ կետի 3-րդ ենթակետի համաձայն, Երևանի քաղաքապետ Կարեն Կարապետյանը հոկտեմբերի 28-ին հրաժարականի դիմում է ներկայացրել:
Նույն օրենքի 48-րդ հոդվածի 2-րդ կետի համաձայն, մինչ օրենքով սահմանված կարգով քաղաքապետի նոր ընտրությունները քաղաքապետի պաշտոնակատար է նշանակվել փոխքաղաքապետ Տարոն Մարգարյանը:
