25.07.2000. ՄԵԴԻԱՄԱՔՍ, ԵՐԵՎԱՆ.«Զանգվածային ոչնչացման զենքի տարածման փոխգործության բնառավառում Հայաստանի եւ ԱՄՆ-ի կառավարույթունների միջեւ համագործակցության մասին» համաձայնագրի ստորագրումը կուժեղացնի հայ-ամերիկյան համագործակցությունը:
Ինչպես հաղորդել են ՄԵԴԻԱՄԱՔՍ գործակալությանը ԱՄՆ-ի Պաշտպանության նախարարության մամլո գրասենյակում, այս մասին հայտարարել է ԱՄՆ-ի պաշտպանության նախարար Ուիլիամ Քոենը` այցով ԱՄՆ-ում գտնվող իր հայ պաշտոնակից Սերժ Սարգսյանի հետ կայացած համատեղ մամլո ասուլիսում:
Քոենը նշել է, որ հուլիսի 24-ին ստորագրված համաձայնագրի շրջանակներում ԱՄՆ-ը Հայաստանին կհատկացնի 300 հազ. դոլար, որոնք կօգտագործվեն անձնակազմի ուսուցման եւ անհրաժեշտ սարքավորումների ձեռք բերման համար: «Սա Հայաստանին կօգնի կատարելագործել մաքսային եւ սահմանային վերահսկողության ծառայությունները` զանգվածային ոչնչացման, ինչպես նաեւ միջուկային, քիմիական, կենսաբանական զենքերի մաքսանենգությունը եւ տարածումը կանխելու նպատակով», - հայտարարել է ԱՄՆ-ի պաշտպանության նախարարը:
Ուլիամ Քոնենը նշել է նաեւ, որ ընթացիկ տարում ԱՄՆ-ը համաձայնել է աջակցություն ցուցաբերել Հայաստանին` Ղարաբաղյան հակամարտության ավարտից հետո մնացած հակահետեւակային ականների ոչնչացման գործում: ԱՄՆ-ի պաշտպանության նախարարը ասել է, որ համաձայնագրի ստորագրմանը հետեւող միջոցառումները չեն նախատեսում ամերիկյան զորքերի մասնակցությունը: Նրա խոսքերով, ԱՄՆ-ի զինվորական մասնագետները միայն դասախոսություններ կանցկացնեն Հայաստանի մաքսային եւ սահմանային վերահսկողության ծառայությունների անձնակազմների համար: --0--