Նոյեմբերի 9-ին Ավստրիայում ՀՀ դեսպան Արման Կիրակոսյանը իր հավատարմագրերն է հանձնել Ավստրիայի Հանրապետության դաշնային նախագահ Հայնց Ֆիշերին, հաղորդում է ԱԳՆ մամլո ծառայությունը:

Պաշտոնական արարողությունից հետո տեղի ունեցած զրույցի ընթացքում Ավստրիայի նախագահը գոհունակություն է հայտնել հայ-ավստրիական հարաբերությունների զարգացման դրական առաջընթացի առնչությամբ: Ընդգծելով երկու երկրների միջեւ գոյություն ունեցող բարձր մակարդակի քաղաքական երկխոսությունը` Ավստրիայի դաշնային նախագահը կարեւորել է տնտեսական ոլորտում հարաբերությունների նշանակությունը եւ դրանք ակտիվացնելու անհրաժեշտությունը:

Դեսպան Կիրակոսյանը նշել է, որ Հայաստանը բարձր է գնահատում հայ-ավստրիական ավանդական բարեկամական հարաբերությունների ներկայիս մակարդակը եւ կարեւորում է ավստրիական կողմի հավասարակշռված մոտեցումները Հարավային Կովկասի տարածաշրջանի վերաբերյալ: Հայաստանի դեսպանն անդրադարձել է հայ-ավստրիական միջկառավարական հանձնաժողովի գործունեությանը եւ երկու երկրների զարգացման գործակալությունների միջեւ ստեղծված համագործակցությանը: Հանդիպմանը կողմերը քննարկել են նաեւ միջազգային կառույցներում համագործակցությանը, ինչպես նաեւ Հարավային Կովկասում անվտանգությանը եւ կայունությանն առնչվող հարցեր: