Մոսկվայում 2011թ. նոյեմբերի 21-ին Հայաստանի ազգային փոխադրող «Արմավիա» և ռուսական «Տրանսաէրո» ավիաընկերությունները Մոսկվա – Երևան – Մոսկվա ուղղությամբ չվերթների համատեղ շահագործման մասին կոդ-շերինգային համաձայնագիր են կնքել: Համատեղ շահագործման չվերթներ են դառնում «Դոմոդեդովո» և «Զվարթնոց» օդանավակայանների միջև կատարվող չվերթները:

Ինչպես PanARMENIAN.Net-ի թղթակցի հետ զրույցում հաղորդել է «Արմավիայի» մամլո քարտուղար Նանա Ավետիսովան, համաձայնագիրը հայկական կողմից կնքել է ավիաընկերության նախագահ Միխայիլ Բագդասարովը, իսկ ռուսական կողմից` «Տրանսաէրոյի» գլխավոր տնօրեն Օլգա Պլեշակովան:

Համաձայնագիրը նախատեսում է, որ իր գործողության սկզբնական փուլում այդ ուղղությամբ թռիչքները կկատարի «Արմավիա» ընկերությունը: 2012թ. մարտին Ռուսաստանի և Հայաստանի մայրաքաղաքների միջև չվերթները կսկսի կատարել նաև «Տրանսաէրո» ավիաընկերությունը: Բացի դրանից, համաձայնագրի մասնակիցները հնարավորություն են ստանում ուղղակիորեն վաճառել կոդ-շերինգային չվերթների ավիատոմսերը: