Հայաստանի կառավարությունը որոշում է կայացրել երեխայի որդեգրման կարգում փոփոխություններ կատարվելու վերաբերյալ: ՀՀ սոցիալական ապահովության նախարար Աղվան Վարդանյանի խոսքերով, այսուհետ Հայաստանում երեխա որդեգրելու ցանկություն ունեցող օտարերկրյա քաղաքացիները պետք է սպասեն ոչ թե 3, այլ 6 ամիս: Այդ ընթացքում երեխա որդեգրելու առաջնահերթ հնարավորություն կտրվի Հայաստանի քաղաքացիներին: Նման որոշման ընդունումը բացատրվում է նրանով, որ վերջին տարվա ընթացքում գրեթե երկու անգամ ավելացել է օտարերկրյա քաղաքացիների թիվը, որոնք դիմել են համապատասխան ատյաններ` հայկական մանկատներից երեխա որդեգրելու խնդրանքով: Վիճակագրական տվյալների համաձայն, 2003 թվականի սկզբից օտարերկրացիների կողմից որդեգրվել է 76 հայ երեխա: