Ատոմային էներգիայի միջազգային գործակալության (ՄԱԳԱՏԷ) Կառավարիչների խորհուրդը նոյեմբերի 18-ին ընդունել է Իրանի վերաբերյալ բանաձևի նախագիծը, որը նախապատրաստել էր միջազգային միջնորդների «վեցյակը»: Բանաձևի հեղինակները կոչ են անում Իրանին թույլ տալ փորձագետների մուտքը միջուկային օբյեկտներ և պնդում են, որ համագործակցությունն Իրանի ու ՄԱԳԱՏԷ-ի միջև ակտիվանա:
Մեկնաբանելով այդ իրավիճակը՝ ՀՀ կառավարությանը կից Միջուկային անվտանգության կարգավորման պետական կոմիտեի նախագահ Աշոտ Մարտիրոսյանը նշել է, որ այդ հարցը իրավաբանական հարց է և բխում է այն պարտավորություններից, որոնք նախատեսված են Գործակալության և Իրանի միջև կնքված պայմանագրով: «Փորձագետների մուտքը միջուկային օբյեկտներ թույլ տալու կոչով Իրանին ուղղված բանաձևը նույնպես քաղաքական բնույթ է կրում, ոչ մի երկիր չի ստանձնի այդ հարցը մեկնաբանելու իրավունքը»,-հավելել է փորձագետը: