Հայաստանում արդեն գրանցվել են աճի դրական միտումներ, Երևանում դեկտեմբերի 2 հայտարարել է Հայաստանի էկոնոմիկայի նախարար Տիգրան Դավթյանը: «Մինչ տարվա ավարտը մնացել է մեկ ամիս, բայց արդեն հիմա կարելի է ասել, որ արդյունքները գոհացնող են»,- ընդգծել է նա: Նախարարի խոսքով, 2011 թ արդյունքներով Հայաստանում սպասվում է ՀՆԱ-ի 5 տոկոս աճ, «քիչ ավելի բարձր քան ծրագրվում է պետբյուջեով»:

Այս համատեքստում Տիգրան Դավթյանը հավելել է, որ այդ աճը, հիմնականում պայմանավորված է էկոնոմիկայի իրական սեկտորի ակտիվ աճով: «Տարվա արդյունքներով սպասվում է արդյունաբերության աճ, արտահանման ծավալների աճ 20-25 տոկոսով, ներդրումների ծավալների աճ, զբոսաշրջության ոլորտում արդեն գրանցվել է 13% աճ, աճ կգրանցվի նաև գյուղատնտեսության ոլորտում, անկում է դիտվում միայն շինարարության բնագավառում»,- ասել է նա:

Անդրադառնալով արտաքին ռիսկերին՝ նախարարը հույս է հայտնել, որ ղեկավարները ճգնաժամը հաղթահարելու համար ճանապարհներ կգտնեն, «իսկ Հայաստանը արդեն սովորել է դիմակայել դրան՝ ստացած դասերի հաշվին, և այժմ ղեկավարները չեն սպասում, թե երբ այն վրա կհասնի, այլ կանխարգելիչ միջոցներ են ձեռնարկում»: