Այսօր` դեկտեմբերի 7-ին, առավոտյան ժամը 11:41-ին Օձունի Սբ. Աստվածածնում հնչել է 23 զանգ` ի հիշատակ տասնյակ հազարավոր անմեղ կյանքեր խլած ավերիչ երկրաշարժի 23-ամյակի, որից հետո եկեղեցում կատարվել է հոգեհանգստյան արարողություն: Այնուհետև Օձունում տեղի է ունեցել մեծ քայլերթ` ի հիշատակ երկրաշարժի անմեղ զոհերի: Քայլերթին մասնակցել է մոտ 3500 մարդ: Նրանք ծաղկեպսակներ և ծաղիկներ են դրել երկրաշարժի զոհերին նվիրված խաչքարի մոտ: Այսօր Հայաստանում հարգանքի տուրք են մատուցում 1988թ. Սպիտակի երկրաշարժի զոհերի հիշատակին: 23 տարի առաջ` դեկտեմբերի 7-ին, տարերային աղետն ավերիչ հարված հասցրեց հանրապետության հյուսիս-արևմտյան շրջաններին:

Նալբանդ գյուղում գտնվող էպիկենտրոնում երկրաշարժի ուժգնությունը կազմում էր 10 բալ Ռիխտերի սանդղակով: Պաշտոնական տվյալներով, երկրաշարժի արդյունքում զոհվեց ավելի քան 25 հազար մարդ, 19 հազարը հաշմանդամ դարձավ, անօթևան մնաց 530 000 բնակիչ:

Նալբանդ գյուղը գետնի տակ անցավ, հիմնովին ավերվեց Սպիտակը, Գյումրու (Լենինական) շենքերի 80 տոկոսը: Սպիտակի երկրաշարժը XX դարի ամենաավերիչ երկրաշարժերից մեկը դարձավ: