Թուրքիայի արտգործնախարարությունը ուղերձ է տարածել, որում նշվում է, որ ֆրանսիական իշխանությունների կողմից Հայոց ցեղասպանության ժխտման քրեականացման մասին օրինագծի ընդունումն անհետևանք չի մնա, գրում է թուրքական Hurriyet-ը:
«Թուրքիան և Ֆրանսիան հարաբերությունների ակտիվացման փուլ են թևակոխել, մենք հուսով ենք, որ հաշվի առնելով այս համատեքստը` անդառնալի որոշումներ չեն ընդունվի»,- նշվում է ուղերձում:
Թուրքիայի ԱԳՆ-ն Ֆրանսիային կոչ է արել երկխոսության միջոցով լուծել երկկողմ հարաբերություններում ստեղծված իրադրությունը:
Դեկտեմբերի 8-ին Ֆրանսիայի Ազգային ժողովի օրենսդրության կոմիտեն Հայոց ցեղասպանության ժխտման քրեականացման մասին օրինագիծ ընդունեց: Օրինագիծը Հայոց ցեղասպանության ժխտման համար նախատեսում է մեկ տարվա ազատազրկում և 45 հազ եվրոյի չափով տուգանք:
2001 թվականին Ֆրանսիան պաշտոնապես ճանաչել է Հայոց ցեղասպանության փաստը: