Ֆրանսիայի նախագահ Նիկոլյա Սարկոզինհրաժարվել է Թուրքիայի նախագահ Աբդուլլահ Գյուլի հետ հեռախոսազրույցից, հաղորդում է CNN Turk հեռուստաալիքը: Գյուլը ցանկացել է անձամբ խոսել Ֆրանսիայի նախագահի հետ՝ ներկայացնելու համար իր դիրքորոշումը Հայոց ցեղասպանության ժխտումը քրեականացնող օրինագծի վերաբերյալ:
Ելիսեյան պալատը իրազեկված էր, որ Գյուլը ցանկանում է անձամբ խոսել Սարկոզիի հետ, սակայն, խնդրանքը չի բավարարվել: Ինչպես հայտնել է աղբյուրը Թուրքիայի նախագահի աշխատակազմում, «մենք պատասխան չստացանք Սարկոզիից: Նա քաջություն չունեցավ խոսելու այդ հարցի շուրջ»: Երբ Գյուլի հարցումը մերժվեց, թուրք նախագահի կայքում անմիջապես հայտարարություն հայտնվեց, որով կոչ է արվում արգելափակել օրինագծի ընդունումը:
Գյուլը հայտարարել է, թե Թուրքիան հուսով է, որ Ֆրանսիան չի զոհաբերի Անկարայի ու Փարիզի բազմամյա բարեկամությունը «մանր քաղաքական հաշվարկների համար»:
