2012թ.-ի առաջին եռամսյակում Յունիբանկը կգործարկի հայաստանյան շուկայում նախադեպը չունեցող մոբիլ բանկինգ /mobile banking/ ծառայությունը, որի շնորհիվ հաճախորդը բջջային հեռախոսի միջոցով կկարողանա կատարել բանկային գործարքներ և վճարումներ ցանկացած վայրից: Ծառայությունից օգտվելու համար հաճախորդների բջջային հեռախոսներում կներդրվի հատուկ ծրագիր, որը կապահովի անկանխիկ գործարքների անվտանգ իրականացումը, ասվում է բանկի մամլո հաղորդագրության մեջ:

«Mobile banking-ի տեխնոլոգիան հնարավորություն է տալիս հաճախորդին հեռախոսի միջոցով կառավարել իր բանկային հաշիվները: Mobile banking փաթեթից հայաստանյան շուկայում լայնորեն կիրառվում է միայն SMS-հաղորդագրությունների միջոցով տեղեկատվության տրամադրման ծառայությունը: Այնինչ mobile banking-ը բանկային հաշիվների հետ լիարժեք աշխատելու հնարավորություն է ընձեռում, ինչը և մենք պատրաստվում ենք այս տարի առաջարկել մեր հաճախորդներին», - ասում է Յունիբանկի Վարչության նախագահի տեղակալ, քարտային բիզնեսի ուղեկցման գծով տնօրեն Մեսրոպ Հակոբյանը: