CES 2012-ին Microsoft ընկերության գործադիր տնօրեն Սթիվ Բալմերն իր ելույթի ժամանակ մի քանի կարևոր հայտարարություններ արեց Windows 8-ի և Kinect-ի մասին։ Այս մասին գրում է Pcworld-ը։

«Ո՞րն է հաջորդը։ Հաջորդը Windows 8-ն է։ Ոչինչ այնքան կարևոր չէ Microsoft-ի համար, որքան Windows 8-ը»,- նշել է ելույթի ժամանակ Սթիվ Բալմերը։

Նա խոսել է Windows նոր Metro ոճից։ Ողջ բեմը ձևավորված է եղել Metro-ի գույներով և ոճով։ Նա ցուցադրել է Windowsn Phone 7.5-ով աշխատող նոր Nokia Lumia 900-ը, ինչպես նաև դարձյալ WP 7.5-ով աշխատող նոր HTC Titan 2-ը։

Ընդհանուր առմամբ Սթիվ Բալմերն իր խոսքում ընդամենը մի քանի կարևոր տեղեկություններ է հայտնել։ Այն է` Windows 8-ը շուկա կմտնի փետրվարի վերջին և հենց այդ ժամանակահատվածում կգործարկվի Microsoft Windows store ծրագրերով։

Նրա խոսքում մյուս կարևոր լուրն այն էր, որ Kinecet-ի ծրագրային փաթեթը (SDK) Windows օպերացիոն համակարգի համար հասանելի է լինելու փետրվարի 1-ին։

Նշենք, որ CES 2012-ը վերջին CES-ն է, որին մասնակցում է Microsoft-ը։ Այս մասին ավելի վաղ արդեն հայտնել էր ընկերությունը։ Ընդհանրապես Microsoft-ը սովորություն չունի իր գլխավոր արտադրանքների առաջին ցուցադրությունները կատարել CES-ի ժամանակ։ Հենց նույն պատճառով էլ այս տարի ցուցահանդեսին չի մասնակցում Apple ընկերությունը։

CES 2012 (Սպառողների էլեկտրոնիկայի ցուցադրություն) միջազգային ցուցահանդեսը անցկացվում է հունվարի 10-13-ը ԱՄՆ-ի Լաս Վեգաս քաղաքում։ Ցուցահանդեսի նախնական ցուցադրությունները մեկնարկել են հունվարի 5-ին։ Ցուցահանդեսին կներկայանան ընկերություններ ավելի քան 140 երկրներից։