Հայաստանի նոր Ընտրական օրենսգիրքը խոտան է և ծառայում է միայն ՀՀԿ իշխանության պահպանության համար: Այդ մասին Երևանում կայացած մամուլի ասուլիսում հայտարարել է ՀԱԿ ներկայացուցիչ, Հայաստանի ժողովրդական կուսակցության վարչության քարտուղար Ֆելիքս Խաչատրյանը: Նա հերթական անգամ կրկնել է ընդդիմադիր ուժերի` 100-տոկոսանոց համամասնական ընտրահամակարգին անցնելու պահանջը, հայտարարելով, որ դա կնպաստի ապագա խորհրդարանի մակարդակի բարձրացմանը, և կդժվարացնի այնտեղ օլիգարխների և «տեղի հեղինակությունների» ներթափանցումը մեծամասնական ընտրակարգի միջոցով:
Խաչատրյանը նաև հայտարարել է, որ գործող խորհրդարանը օրենսդիր և գործադիր իշխանությունների հետ համատեղ պատասխանատու է երկրում աղետալի վիճակի համար:
Իր հերթին ՀՀԿ անդամ, պատգամավորՎարդան Այվազյանը պաշտպանել է մեծամասնական ընտրակարգի պատգամավորներին, հայտարարելով, որ նրանց մեծ մասը ակտիվորեն աշխատում է: Նա նաև մտահոգություն է հայտնել, որ անցումը 100-տոկոսանոց համամասնական ընտրակարգին ԱԺ-ն կվերածի «երևանցիների խորհրդարանի»:
Այվազյանը նաև չի համաձայնվել խորհրդարանի քննադատության հետ՝ հայտարարելով, որ «խոտանված» խորհրդարանը չէր կարող ընդունել ավելի քան 300 օրենքներ և օրինագծեր:
