Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի ընդունումը կապված է նրան հետ, որ Թուրքիան ձախողեց Հայաստանի հետ հարաբերությունների կարգավորման քաղաքականությունը: Այդ մասին Երևանում կայացած մամլո ասուլիսում հայտարարել է քաղաքագետ Սերգեյ Մինասյանը:

Նա նշել է, որ Հայոց ցեղասպանության հարցը Եվրոպան և ԱՄՆ-ն օգտագործում են որպես Թուրքիայի հանդեպ ճնշում գործադրելու միջոց և Թուրքիան կարող է խուսափել դրանից, միայն կարգավորելով հարաբերությունները Հայաստանի հետ:

Սենատի որոշման առումով կարևոր է նաև այն, որ նույն իրավաբանական հարթության վրա են դրվել Հոլոքոսթն ու Հայոց ցեղասպանությունը:

Մինասյանը նշել է նաև, որ Ֆրանսիայի որոշումը մեծ դեր կունենա Եվրոպայի իրավական ու քաղաքական դաշտում, Թուրքիայի հետ Եվրոպայի հարաբերությունների հարցում:

Հունվարի 23-ին Ֆրանսիայի Սենատը կողմ է քվեարկել ցեղասպանությունների,այդ թվում` Հայոց ցեղասպանության ժխտումը քրեականացնող օրինագծին: Ընդհանուր առմամաբ քվեարկել են 213 սենատորներ, որոնցից 127-ը «կողմ», 86-ը «դեմ»: Օրինագիծը մերժման համար նախատեսում է 1 տարվա ազատազրկում և 45 հազար եվրո տուգանք:

2011թ դեկտեմբերին օրինագիծն ընդունվել էր Ֆրանսիայի ԱԺ կողմից:

Օրինագծի ընդունման դեպքում Թուրքիայի իշխանությունները սպառնում էին Ֆրանսիայի հետ բոլոր դիվանագիտական կապերի խզումով: Ավելին, Թուրքիայի վարչապետ Ռեջեփ Թայիփ Էրդողանը հայտարարել էր, որ երբեք չի այցելի Ֆրանսիա, եթե օրինագիծը ընդունվի: