Լուրեր են տարածվել, թե փետրվարին կայանալիք Mobile World կոնգրեսի ժամանակ Samsung ընկերությունը պատրաստվում է ներկայացնել իր Galaxy S շարքի սմարթֆոնի երրորդ սերունդը ՝ Galaxy S III-ը: Այս մասին հաղորդում է t3.com-ը:

Հիշենք, որ ընկերությունը Galaxy S շարքի նախորդ երկու սմարթֆոնները ներկայացրել է հենց այս կոնգրեսի ժամանակ: Galaxy S III սմարթֆոնի պարամետրերից լրատվամիջոցներին հայտնի է, որ այն աշխատելու է Android օպերացիոն համակարգի վերջին տարբերակով՝ Android 4.0 Ice Cream Sandwich-ով և որ հավանաբար, այն ունենալու է 4.65 դյույմ անկյունագծով HD Super AMOLED էկրան:

Կրկին, ըստ տարածվող լուրերի, այն ունենալու է 2Գբ ներքին հիշողություն և ևս 32Գբ ավելացնելու հնարավորություն: Սմարթֆոնի ֆոտոխցիկը լինելու է 12 Մպ, այն ծառայելու է նաև որպես տեսախցիկ: Դե իսկ Galaxy S III-ն ունենալու է 1.5GHz կամ էլ 1.6GHz հզորությամբ քառակի պրոցեսոր:

Հիշենք, որ Galaxy S սմարթֆոնների շարքի հիմնական մրցակիցը Apple-ի iPhone սմարթֆոնն է: Կկարողանա՞ արդյոք ապագա Galaxy S III-ը մրցակցել ապագա iPhone 5-ի հետ: Այս հարցը, թերևս, տեխնոլոգիաների ոլորտում ամենասպասվածն է: