Բնապահպանության նախարարությունն ու Գլոբալ էկոլոգիական հիմնադրամն այս տարի կսկսեն «Նուբարաշենի թունաքիմիկատների ոչնչացում» ծրագիրը։ Այսօր լրագրողնրի հետ հանդիպմանն այս մասին ասաց բնապահպանության նախարար Արամ Հարությունյանը՝ նշելով, որ ԳԷՀ ֆինանսավորումը կկազմի 5 մլն եվրո։
«Այս ծրագրի նպատակն է Նուբարաշենում պահեստավորված բոլոր թունավոր նյութերը ոչնչացնել։ Մեր նշած 5 մլն եվրոն անհրաժեշտ կլինի դրանք վեր հանելու, փաթեթավորելու, տեղափոխելու ու ոչնչացնելու համար։ Բնականաբար, մեր կողմից էլ կլինեն ներդրումներ»,- ասաց նախարարը։
Նա նշեց, որ դեռևս պարզ չէ՝ որտեղ կոչնչացվեն թունաքիմիկատները. «Կարող է տանենք այլ երկիր, բայց մենք նաև տեղում ունենք հնարավորություն այդ թունաքիմիկատները ոչնչացնելու։ Մի քանի գործարաններ ունենք, որտեղ դրված են 2000 և ավելի ջերմաստիճանի վառարաններ, որտեղ կարող ենք վերացնել դրանք՝ պահպանելով բանապահպանական նորմերը»։