Իրանի ու Ռուսաստանի հարաբերությունները բավականին խախուտ են, ասել է Իրանի նախկին նախագահ Ալի Աքբար Հաշեմի Ռաֆսանջանին իրանական EuroAsia հետազոտական կենտրոնի վեբ-կայքին տված հարցազրույցում:
Ալի Աքբար Հաշեմի Ռաֆսանջանին, որը Իրանի քաղաքական նպատակահարմարության խորհրդի նախագահն է, ասել է, որ Ռուսաստանի ու Իրանի հարաբերություններում վերջին տարիներին սառեցում է նկատվում: Ըստ նրա, պատճառը «ՌԴ քաղաքականության երկակի բնույթն է», ինչպես նաև այն փաստը, որ «Իրանը սխալ էր գնահատում համաշխարհային քաղաքականությունը սառը պատերազմից հետո»:
«Ռուսաստանի ու Իրանի հարաբերությունները փոխվեցին ՌԴ քաղաքականության նոր ուղղվածության հետ կապված»,-ասել է Ռաֆսանջանին: Ըստ նրա, եթե նախկինում Ռուսաստանի քաղաքականությունը բխում էր Իրանի հետ ընդհանուր շահերից, ապա այժմ այն ավելի առևմտամետ է դարձել, և ելնում է սեփական տնտեսական զարգացման ու ազգային շահերից:
Ինչ վերաբերում է ՌԴ առաջարկին, ապա Ռաֆսանջանին կարծում է, որ «ՌԴ նախաձեռնում է և ցանկանում է դրական պահեր տեսնել միջուկային խնդրի առումով»:
«Ինչպես և Արևմուտքը, Ռուսաստանը վախենում է, որ Իրանը կարող է միջուկային զենք ստեղծել»,-ասել է նա:
