Դժվար թե ՀՀ ԸՕ-ը փոփոխության ենթարկվի մինչև մայիսին կայանալիք խորհրդարանական ընտրությունները: Նման կարծիք է հայտնել «Ազատ դեմոկրատներ» կուսակցության ներկայացուցիչ Ալեքսանդր Արզումանյանը, անդրադառնալով 100-տոկոսանոց համամասնական ընտրակարգին անցնելուն: Ըստ նրա, «այժմ հասարակությունում «կոնսենսուս-1» իրավիճակ է, քանի որ միայն ՀՀԿ-ն է դեմ մեծամասնական համակարգից հրաժարվելուն»:

Ինչ վերաբերում է ԲՀԿ-ի` այս գաղափարին աջակցելուն, ապա ըստ Արզումանյանի, միայն խորհրդարանական լսումները ցույց կտան, թե ԲՀԿ-ն իրականում ինչ դիրքորոշում ունի այս հարցի առնչությամբ: Նա նաև հաղորդել է, որ ելնելով կուսակցության սկզբունքային դիրքորոշումից, «Ազատ դեմոկրատները» մեծամասնական համակարգով թեկնածուներ չեն առաջադրելու:

Փետրվարի 1-ին Հայաստանի ԱԺ պետաիրավական հարցերով մշտական խորհրդարանական հանձնաժողովը իր նիստի ժամանակ որոշում է կայացրել փետրվարի 15 անցկացնել լսումներ`100-տոկոսանոց համամասնական ընտրակարգին անցում կատարելու վերաբերյալ:

Ընդդիմադիր «Ժառանգություն» և ՀՅԴ կուսակցություները 2011թ դեկտեմբերի 27 համատեղ հայտարարությամբ են հանդես եկել, որում կոչ են արել չեղյալ համարել մեծամասնական ընտրահամակարգը և անցում կատարել 100 տոկոսանոց համամասնական ընտրահամակարգին: Այս նախաձեռնությանն իր աջակցությունն են հայտնել ՀԱԿ-ը և մի շարք այլ ընդդիմադիր ուժեր:

Հունվարի 26-ին կոալիցիոն ԲՀԿ-ն, ընդդիմադիր Դաշնակցության և «Ժառանգության» հետ միասին, դիմել է ԱԺ խոսնակ Սամվել Նիկոյանին` 100 տոկոսանոց համամասնական ընտրահամակարգին անցում կատարելու վերաբերյալ խորհրդարանական լսումներ կազմակերպելու խնդրանքով: