Համահայկական 5-րդ կրթական խորհրդաժողովը տեղի կունենա 2012թ. օգոստոսի 10-14-ը՝ Հայաստանում: ՀՀ կրթության և գիտության նախարարությանից հայտնում են, որ իրենց կողմից արդեն սկսվել են նախապատրաստական աշխատանքները:
Համահայկական 5-րդ կրթական խորհրդաժողովում քննարկվելու են 2010 թվականի 4-րդ խորհրդաժողովի ժամանակ ընդունված բանաձևի դրույթների իրականացման ուղղությամբ կատարված աշխատանքները, ծրագրամեթոդական առկա հիմնահարցերը, կադրերի պատրաստման և վերապատրաստման, փորձի փոխանակման, ինչպես նաև Հայոց ցեղասպանության 100-ամյակին ընդառաջ նախագծվող միջոցառումները:
Խորհրդաժողովները գումարվում են երկու տարին մեկ անգամ՝ սկսած 2004 թվականից: Նպատակը արտերկրի հայկական կրթօջախների հիմնահարցերը, կրթության ոլորտում Հայաստան-Սփյուռք կապերի ամրապնդման և համագործակցության զարգացման ծրագրերը քննարկելն ու հստակեցնելն է: Խորհրդաժողովները գումարվում են բաց հրավերի տարբերակով, աշխատանքները կազմակերպվում են բաց քննարկումների ձևով` լիագումար նիստերում և թեմատիկ մասնախմբերում:
