Ֆրանսիայի Սենատում Հայոց ցեղասպանության ժխտումը քրեականացնելու մասին օրինագծի ընդունումից հետո թուրքերը սկսել են անհանգստանալ Ցեղասպանության զոհերի սերունդներին վնաս փոխհատուցելու հնարավոր հայցերի մասին:
Այսպես, թուրքական Milliyet-ը հոդված է հրապարակել՝ նվիրված իտալական դատարանի փորձի հնարավոր կիրառմանը նացիստական ռեժիմի զոհերին վնաս փոխհատուցելու առթիվ:
«Ֆրանսիական դատարանը կարող է տեղային որոշումներ ընդունել, որոնք չեն վերաբերվի վնասի փոխհատուցմանը, ինչպես դա արել է իտալական դատարանը»,- ասվում է հոդվածում:
2008-ի դեկտեմբերին Գերմանիան Իտալիայի դեմ հայց է ներկայացրել միջազգային դատարան՝մեղադրելով նրան միջազգային օրենսդրությամբ սահմանված պարտավորությունները չկատարելու, մասնավորապես, իր պետական իրավաբանական իմունիտետը խախտելու մեջ: Միջազգային դատարանում լսումները տեղի են ունեցել 2011-ի սեպտեմբերի 12-16-ը: Դրանցում Գերմանիան նախազգուշացրել է «լուրջ հետևանքների» հնարավորության մասին, եթե ՄԴ-ը պաշտպանի Իտալիային Երկրորդ համաշխարհային պատերազմի տարիներին նացիստների հանցագործությունների համար փոխհատուցում վճարելու մասին վեճի մեջ:
Իտալիայի վճռաբեկ դատարանը հայտարարել է, որ նացիստական հանցագործությունների զոհերը կարող են իտալական դատարաններում հայցեր են ներկայացնել Գերմանիայի դեմ: Եվ թեև պետությունները պատասխան չեն տալիս այլ երկրների դատարանների առջև, Իտալիայի վճռաբեկ դատարանը որոշել է, որ այդ սկզբունքը չի տարածվում մարդկության դեմ կատարած հանցագործությունների վրա: Իտալական դատարանի որոշմամբ Գերմանիան պարտավոր է փոխհատուցում վճարել իտալական ընտանիքներին: