Եվրոպացի սպառողները շարունակում են ռուսական գազի պակաս զգալ, չնայած նրան, որ «Գազպրոմը» անցյալ շաբաթվա համեմատ ավելացրել է գազի առաքումները դեպի արևմտյան ուղղություն:
Առավել ծանր դրությունում հայտնվել է Իտալիան, որտեղ կառավարությունը ստիպված է սահմանափակել որոշ ձեռնարկությունների գազամատակարարումը՝ բնակելի տների ջեռուցումն ապահովելու համար: Ինչպես հաղորդում է Ռեյտեր գործակալությունը, երկուշաբթի օրը Իտալիան 20 տոկոսով պակաս է ստացել ռուսական գազ, միևնույն ժամանակ փոթորիկները շարունակում են ուշացնել Քաթարից հեղուկ գազի տանկերների ժամանումը:
Արդյունաբերության հարցերով իտալացի նախարար Կորադո Պասերան իրավիճակն անվանել է «կրիտիկական»:
Միաժամանակ, Իտալիայի կառավարությունը պնդում է, որ բնակելի տների ջեռուցմանն առայժմ ոչինչ չի սպառնում: «Ընտանիքները կարող են չանհանգստանալ»,- ասել է տնտեսական զարգացման փոխնախարար Կլաուդիո դե Վինսենտին: Սակայն Eni իտալական էներգետիկ ընկերությունը նշել է, որ գազի պաշարները կբավականացնեն մինչև շաբաթվա կես:
