Նախագահ Սերժ Սարգսյանի հանձնարարությամբ որոշվել է նոր շունչ հաղորդել «Երևանի ՋԷԿ» ՓԲԸ հին էներգաբլոկին՝ նորագույն տեխնոլոգիաների կիրառմամբ: Ինչպես փետրվարի 16-ին լրագրողներին հայտնեց ՀՀ էներգետիկայի ու բնական պաշարների նախարար Արմեն Մովսիսյանը, հին էներգաբլոկի շահագործումը շարունակելու համար կկիրառվի նորագույն տեխնոլոգիա՝ ջուր-ածխային վառելիքի օգտագործմամբ: «Դա շատ շահավետ է ինչպես տնտեսական, այնպես էլ բնապահպանական տեսակետից»,-հավաստիացրել է նախարարը:

Փետրվարի 2-ի նիստում ՀՀ կառավարությունը որոշում է կայացրել Ներդրումային ծրագրի շրջանակներում «ՀԱՆԱ-ՏՐԱՆՍ» սահմանափակ պատասխանատվությամբ ընկերության կողմից 300 միլիոն դրամը գերազանցող ապրանքների ներմուծման դեպքում մաքսային մարմինների կողմից հաշվարկված ավելացված արժեքի հարկի գումարների վճարման ժամկետը մինչև երեք տարի ժամկետով հետաձգելու մասին

Ինչպես լրագրողներին է հայտնել էկոնոմիկայի նախարար Տիգրան Դավթյանը. «ՀԱՆԱ-ՏՐԱՆՍ» ՍՊ ընկերությունը ներդրումային ծրագրի շրջանակներում նախատեսում է կազմակերպել ԼՂՀ Մաղավուզի շրջանից ածուխի փոխադրումը Վարդենիսի երկաթուղային հանգույց` հետագայում այն «Հասա Գրուպ» ընկերության միջոցով` երկաթուղով ք. Երևան փոխադրելու նպատակով, որը պետք է կիրառվի որպես ջուր-ածխային վառելիք` ապահովելով «ԵՐԵՎԱՆԻ ՋԷԿ» ՓԲԸ-ի կողմից էլեկտրոեներգիայի ստացում:

Տիգրան Դավթյանը նշել է, որ բեռնափոխադրումների կազմակերպման համար «ՀԱՆԱ-ՏՐԱՆՍ» ՍՊ ընկերությունը` համապատասխան պայմանագրի համաձայն SCANIA ընկերությունից ձեռք է բերել 40 ինքնաթափ ավտոմեքենաներ, որի համար ներդրումները կազմում են մոտ 1.9 մլրդ ՀՀ դրամ: «Սա ներքին կոոպերացիայի լավ օրինակ է և նոր մոտեցում Հայաստան-ԼՂՀ համագործակցությանը»,-ասել է նախարարը

Ներդրումային ծրագրի շրջանակներում նախատեսվում է ստեղծել մոտ 50 աշխատատեղ` 180 հազար ՀՀ դրամ միջին աշխատավարձով: