Հայկական շոու-բիզնեսի ու մշակույթի ներկայացուցիչները պարբերաբար այցելում են Մաշտոցի պուրակի ակտիվիստներին, հորդորում է նրանց լինել առավել ակտիվ և չդադարեցնել պայքարը:
«Ես այստեղ մտավորական չեմ, ես բնապահպան եմ: Կոչ եմ անում բոլոր մեր երգիչներին, դերասաններին մի կողմ դնեն իրենց կոչումներն ու այստեղ գան որպես բնապահպան»,- ակտիվիստների հետ զրույցում ասաց Արթուր Իսպիրյանը:
Երգիչ Արսեն Գրիգորյանը (Խուճուճ) այսօր ևս այցելել է նրանց. «Ես հիցած եմ էս «շեդևրով», որ մի գիշերում կառուցել են: Մենք չենք խնդրում նոր այգի կառուցել, մենք խնդրում ենք՝ մեր ունեցածը թողնեն մեզ, այն երեխաներին, ովքեր իրենց մանկությունը չեն պատկերացնում սրճարաններում ու ռեստորաններում»:
Հարցին, թե այդքան ակտիվ մասնակցելով բնապահպանների պայքարին, Գրիգորյանը չի վախենում իր կարիերայի համար, նա պատասխանեց. «Ես համոզված եմ, որ իմ քաղաքացիական դիրքորոշումն իմ գործունեությանը չի խոչընդոտի: Ես մշակույթի ներկայացուցիչ եմ, իսկ մշակույթն անձեռնմխելի է»:
